Iwwer mech

Berufflech mat Friemsproochen ëmzegoen, heescht net just, se fléissend ze schwätzen. Gewéinlech befaasst een sech als Sproochemënsch mat sengem Handwierksgeschir scho (bal) e ganzt Liewen. Et kann een iwwer dës Praxiserfarung eraus och déi néideg Qualifikatiounen opweisen a et bilt een sech berufflech weider.

Als gebierteg Lëtzebuergerin, duerch mäi Germanistik-Studium op der Universitéit zu Tréier (D) souwéi duerch e fréie Kontakt mat der däitscher Liewensaart a Literatur schwätzen a schreiwen ech – dat kann ech sou behaapten – perfekt Däitsch. Zwielef Joer laang war ech zu Lëtzebuerg Enseignante fir Däitsch a Lëtzebuergesch, ier ech mech a Frankräich selbststänneg gemaach hunn. Zënter dem 1. Januar 2019 ass meng Entreprise fir sproochlech Déngschtleeschtungen am Répertoire des Entreprises et des Etablissements (SIRENE) agedroen a fënnt säitdeem méi a méi Clienten.

D’Franséischt, mat deem mir zu Lëtzebuerg vu klengem u confrontéiert ginn, hunn ech zwar scho beherrscht, ier ech an eist Nopeschland wunne goung, allerdéngs „kënnt” engem eng Sprooch jo ëmmer réischt richteg, wann ee sech méi laang am betreffende Land ophält. Wann d’Leit ophalen ze froen, wou dee schéine, klengen Accent hierkënnt, huet een et wuel gepackt. Dat hunn ech och wärend mengem Studium op der John Moores University zu Liverpool (GB) misse feststellen. Deen éischte Scouser, mat deem ech mech do ënnerhalen hunn, war paff: „Fugginell, yer speak better than me!” Tjo, d’Standardausprooch RP léiert een eben net op der Strooss an e regionalen Accent nëmmen, wann een och iwwer d’Schoulbänk erauskuckt.

Zu menge rezente Projete gehéieren ënner anerem d’Iwwersetzung vu Werbetexter an Audiodeskriptioun, d’Relecture vun Ofschlossaarbechten an d’Transkriptioun vun diversen Interviewen a Videokonferenzen. Well Qualitéit keen Zoufallsprodukt ass, schaffen ech fir d’Ausgaangssproche Franséisch an Englesch mat professionellen an experimentéierten Iwwersetzer zesummen. Meng Aarbechtsphilosophie ass, all Optrag effizient, zouverlässeg a mat der néideger Diskretioun ze behandelen.

Lynn Heuschling

Fir weider Informatioune kuckt och hei:

www.linkedin.com/in/lyhe/
www.facebook.com/LynnTradu/